Mar 11 | LBB | STEP | Ning la han milau e Jerusalem, pa la hanot Betpage pa e Betani ting ana Mangir na Oliw, e Iesu i sune sen naur a kaklik kusun anuna kakak a asasaerla.

aBuk Song 118:25-26

bAis 56:7

cJer 7:11

Mark 11

E Iesu i han usaot e Jerusalem lar a king

(Mt 21:1-11; Lk 19:28-40; Jn 12:12-19)

1 Ning la han milau e Jerusalem, pa la hanot Betpage pa e Betani ting ana Mangir na Oliw, e Iesu i sune sen naur a kaklik kusun anuna kakak a asasaerla. 2 Pa i atai diau mang, “Mur han sur a hanua kaning lanigo ta mu. Ning mur han kas, mur han tar ana ning a nat a dongki kaning di dot akes tari, pa belot tik i kes pas ono. Mur pak sen pasi pa mur beni ute. 3 Ning tik ir deken mu mang, ‘Sur asa ning mu toli manglarning?’ mur atai i mange, ‘A Leklek i mang kabah suri, pa ir aulak kapiti kale.’”

4 Ning dia han, dia oroi tetek a nat a dongki ning di dot akes tari tumolapiu na ris a taman ana rumai, milau a ngas, pa dia pakseni. 5 Dingla na tarai ning la tur tingia la deken diau mang, “Ai, mu pak sen a nat a dongki ning sur asa?” 6 Dia keles la ana warwara ning e Iesu ka atong tari, pa la noreni ka tan diau. 7 Dia ben tar a nat a dongki tetek e Iesu, pa dia kepsen naur a kaen ning dia polpol alar anundiau na minmar ono, pa dia sua tari saot onoi, pa e Iesu i kes ono. 8 Pa a galis a tarai otleng la kepsen anunla na kaenla ning la polpol alar anunla na minmar ono, pa la sagen tari ting na ngas. Pa dingla na tarai otleng la kuben pas a lai a rakai miting na bual, pa la sua tari ting na ngas. 9 La ning la nigo pa la ning la mur, la kukuk mange,

“Osana! Dalar atong leklek pas esining i hanot ana risana Leklek!” ^a
10 “Dalar atong leklek pas a matanitu ane tamandala e Dewit ning ir hanot!
Osana usaot kol!”
11 Ning e Iesu i hanot saot e Jerusalem, i kas uting na rumai a artabar. Ning ka oroi tar a ututnala rop, i ulak utumo e Betani taum ana nuna ning a bonot pa pisir naur a kakak a asasaerla, anasa ka rahmorom.

E Iesu i warwara tetek a rakai a fig

(Mt 21:18-19)

12 A pukakiar lamur, ning la han mitimo e Betani, e Iesu i murak. 13 I oroi a rakai a fig miting bakbak, i gomgomo wakak. Pa i han sur ir oroi, sur ta wana. Ning i hanot tingia, bel i oroi ta wana ono, a pakpakana oros ka, anasa belot i taun fig. 14 Pa i atai a rakai a fig mange, “Turpasi ne pa lamur, bel tik ulak ma ir ien pas ta waim.” Pa anuna kakak a asasaer la longor akes pas a warwara ning.

E Iesu i kas uting na rumai a artabar

(Mt 21:12-17; Lk 19:45-48; Jn 2:13-22)

15 Ning la hanot saot e Jerusalem, e Iesu i kas ana ning a pukna miting na rumai a artabar, pa i kepsen purum la ning la sisiurai, pa la otleng ning la lolou tingia. I migen lingir a logola anuna tena keles mani pa a keskes anunla ning la siuran a tabunla. 16 Pa bel i noren tar a taraila sur lar los anunla ututnala na sisiurai ting na arpotor ana rumai a artabar. 17 I asaer la mang, “Di ka tumus tari ana Buk Tabu manglarne,

‘Dir atong anuk a rumai mang a rumai a nunung sur a kaba tarai rop.’ ^b
Ika mulo ka tol lingir pasi sur ir arlar kama lar a ‘rumai anuna tena kinkinaula.’” ^c

18 A leklek na tena artabarla tetek e God taum ana tena asaerla tagun a Warkurai otleng la longori, pa la nuknuk sur ta ngas sur lar umkol e Iesu ono, anasa la matatani, anasa a tarai rop la kulkulan ana nuna asasaer.

19 Ning a rah ma, e Iesu taum ana nuna kakak a asasaer la han kusun a hanua Jerusalem.

A asasaer tagun a rakai a fig

(Mt 21:20-22)

20 Ana kobot ning ot, ning la ulak usaot e Jerusalem, la oroi mang a rakai a fig ka marang mitimo ot na wakwakirna usaot. 21 Pa e Pita i nuk pas a warwara ane Iesu, pa i atai i mange, “Tena Asaer, oroi! A rakai a fig ning u warwara rakrakai tar teteki, ka marang rop.”

22 E Iesu i kelesi mange, “Mulor tortorot o e God. 23 A atong momoli ta mulo, ning tik ir atai ta mangir ne mange, ‘Ur takakan, pa ur sirok parung usa latasi,’ pa bel i urmatana nuknuk, i tortorot mang dir tol asa ning ka atong tari, dir toli ot. 24 Manglarning a atongi ta mulo a ututnala rop ning mulo nunung suri, mulor tortorot ka mang di ka saran tari ta mulo, pa dir saran tari ot.

25 “Ning mulo nunung, pa mulo nuk pas ta utna ning tik i tol laulau tari o mulo, mulor duman seni, sur e Tamamulo saot ana langit ir duman sen anumulo na toltol laulaula otleng.” ^{▼▼11.25-26Dingla na tena mananos ana Buk Tabu la nuki mang dingla na warwara otleng i kes ana rina ne. I manglarne:Ning bel mulo nuk duman seni, e Tamamulo otleng saot ana langit bel ir nuk duman sen anumulo na toltol laulaula.}

La kabah e Iesu mang esi i saran a rakrakai tana

(Mt 21:23-27; Lk 20:1-8)

27 La hanot ulak saot e Jerusalem. Ning e Iesu i taltal ana rumai a artabar, a leklek na tena artabarla tetek e God, taum ana tena asaerla tagun a Warkurai pa a ningnigola la han teteki. 28 La dekeni mange, “Esi na ngas a rakrakai ning u tol a ututnala ne ono? Esi i saran tar a rakrakai tam sur ur tol a ututnala ne?” 29 E Iesu i keles la mange, “Iau otleng ar deken mulo ana ning a kabah. Pa ning mulor keles iau, io, ar atai mulo ana rakrakai ning a sira tol a ututnala ne ono. 30 Mitahaia a baptais ning e Jon i baptais a taraila ono? Mitisaot ana langit, o tana taraila ka? Mulor atai iau.” 31 Pa la warwara kumna pas mange, “Ning dalar atongi mang, ‘Mitisaot ana langit,’ ir keles dala ka mange, ‘I mangasa ning bel mulo tortorot onoi?’ 32 Ika ning dalar atongi mange, ‘Tana taraila,’ a tarai lar balakut dala.” La matatan a taraila, anasa la rop la tortorot o e Jon mang i a propet. 33 Pa la keles e Iesu mange, “Bel mila tasmani.” Pa e Iesu i atai la mang, “Iau otleng bel ar atai mulo ana rakrakai ning a sira tol a ututnala ne ono.”